Kabhi To Dekhe Hamari Araq-fishani Dhup

kabhi to dekhe hamari araq-fishani dhup

jale bhawon pe kare apni mehrbani dhup

hamare dagh ko jab aaftab ne dekha

hua ye zard nazar aae zafrani dhup

tap-e-firaq wo bad hai chaDhe jo suraj ko

pighal ke barf ki surat ho pani pani dhup

safar saqar hai hazaron balaen sar par hain

hai ek un mein se aaseb-e-asmani dhup

tah-e-sahab rahe aaftab-e-roz-e-firaq

shuaon se na kare mujh pe tegh-rani dhup

kaTe jo raat bhi zaKHmi-e-hijr ko to kya

hai mar Dalne ko chandni ki sani dhup

rahe shagufta hum is tarah jaise aag ke phul

kabhi na dasht-nawardi mein hum ne pani dhup

safed baal hue jaise tewar aate hain

bahut zaif ko dete hai sargirani dhup

hamein to fasl-e-zamistan bahut KHush aati hai

wo ThanDi ThanDi hawa aur wo suhani dhup

lagae abr ka lukka na kis tarah chhatri

kare na chand se rangat ko aasmani dhup

ajab nahin gul-e-ruKHsar sausani ho jaen

bahaar-e-husn ko hai aafat-e-KHizani dhup

amir shaal-doshaalon mein garm rahat-o-aish

gharib ke liye jaDon mein zindagani dhup

zara si garm hawa mein ye munh banati hain

na kar sakegi gulon ki mizaj-dani dhup

muwafaqat na kabhi sard-o-garm mein hogi

hai chandni meri piri teri jawani dhup

shabab yaad dilate hai sar-safedi-e-'bahr'

hai aaftab-e-jawani ki ye nishani dhup

(714) Peoples Rate This

Your Thoughts and Comments

Kabhi To Dekhe Hamari Araq-fishani Dhup In English By Famous Poet Imdad Ali Bahr. Kabhi To Dekhe Hamari Araq-fishani Dhup is written by Imdad Ali Bahr. Read famous Poem Kabhi To Dekhe Hamari Araq-fishani Dhup for youth and Student by Imdad Ali Bahr. Free Download Kabhi To Dekhe Hamari Araq-fishani Dhup in PDF.