مر گئے ہیں جو ہجر یار میں ہم

مر گئے ہیں جو ہجر یار میں ہم

سخت بیتاب ہیں مزار میں ہم

تا دل کینہ ور میں پائیں جگہ

خاک ہو کر ملے غبار میں ہم

وہ تو سو بار اختیار میں آئے

پر نہیں اپنے اختیار میں ہم

کب ہوئے خار راہ غیر بھلا

کیوں کھٹکتے ہیں چشم یار میں ہم

کوئے دشمن میں ہو گئے پامال

آمد و رفت بار بار میں ہم

نعش پر تو خدا کے واسطے آ

مر گئے تیرے انتظار میں ہم

گر نہیں شیفتہؔ خیال فراق

کیوں تڑپتے ہیں وصل یار میں ہم