بے سبب وہ نہ مرے قتل کی تدبیر میں تھا

بے سبب وہ نہ مرے قتل کی تدبیر میں تھا

اس کے ہاتھوں ہی سے مٹنا مری تقدیر میں تھا

منتظر تھا ترا دیوانۂ گیسو جس رات

عالم چشم ہر اک حلقۂ زنجیر میں تھا

جنبش لب کا گماں ہوتا تھا عاشق کو ترے

اس قدر لطف خموشی تری تصویر میں تھا

او کماں ابرو جو اک تیر لگایا تو کیا

اشتیاق اس سے زیادہ دل نخچیر میں تھا

مرغ بسمل سا تڑپتا تھا ہر اک مرغ سحر

اثر تیر مرے نالۂ شبگیر میں تھا