کیا میں جگنو کو آفتاب کروں

کیا میں جگنو کو آفتاب کروں

یا چراغوں کا انتخاب کروں

دل یہ کہتا ہے انقلاب کروں

پیش اس کو میں اک گلاب کروں

وقت نے کیا نہیں دیا مجھ کو

بے سبب وقت کیوں خراب کروں

سر پٹک کر اب اس کے کوچے میں

اپنی تقدیر سے حساب کروں

میں کروں پھر کوئی سوال نیا

اور پھر اس کو لا جواب کروں

زندگی نے تو ہار مان ہی لی

کم سے کم موت کامیاب کروں

سب کے چہرے پہ ایک چہرہ ہے

کس کا چہرہ میں بے نقاب کروں