لمحہ لمحہ شور سا برپا ہوا اچھا لگا

لمحہ لمحہ شور سا برپا ہوا اچھا لگا

خامشی کی تان ٹوٹی واہمہ اچھا لگا

آنکھوں آنکھوں میں ہوا اک حادثہ اچھا لگا

ملنے والے کیوں تجھے یہ فاصلہ اچھا لگا

کون جانے کون بوجھے داستاں در داستاں

کچھ ہوا کا کچھ دئے کا حوصلہ اچھا لگا

جان کی بازی لگا دی بھید کے کھلنے تلک

عشق والوں کو ہمارا فلسفہ اچھا لگا

اک پہیلی کو مسلسل سوچتا ہوں تو مجھے

با وفا اچھا لگا کہ بے وفا اچھا لگا

لطف منزل حوصلوں سے آ لگا تھا گام گام

تو سفر میں ساتھ تھا تو راستہ اچھا لگا

عمر کی اکتاہٹیں اور درد کے پہلو تمام

جب سے کھلرؔ تو ملا ہے آئنہ اچھا لگا