KHuda-ra Aa Ke Meri Lo KHabar Kahan Ho Tum

KHuda-ra aa ke meri lo KHabar kahan ho tum

mere habib mere chaara-gar kahan ho tum

na raston ki KHabar aur na manzilon ka pata

kahan main jaun mere rahbar kahan ho tum

ai bagh-e-dil ke milansar baghban-e-zaif

daraKHt dene lage hain samar kahan ho tum

sunai deti hai har pal mujhe teri aawaz

dikhai kyun nahin dete magar, kahan ho tum?

ghazab ki dhup hai aur saeban koi nahin

main jal raha hun mere baam-o-dar kahan ho tum

kuchh un ki KHair KHabar sath le ke aae ho?

chale bhi aao mere nama-bar kahan ho tum