بھیگی پلکیں شوق کا عالم وقت کا دھارا کیا نہیں دیکھا

بھیگی پلکیں شوق کا عالم وقت کا دھارا کیا نہیں دیکھا

ہنستے آنسو تلخ تبسم میٹھا غصہ کیا نہیں دیکھا

چھلنی سینے روشن چہرے خونیں آنکھیں رنگیں دامن

ٹھنڈی آہیں ویراں نظریں حشر تمنا کیا نہیں دیکھا

راہ پہ پہرے نطق پہ قدغن شوق کی یورش دل کی دھڑکن

بولتی نظریں بوجھل پلکیں غمگیں چہرہ کیا نہیں دیکھا

سوتی قسمت جاگتے انساں اجڑی بستی شمع فروزاں

جھوٹے قصے الٹی تہمت بات کا بننا کیا نہیں دیکھا

بکھری زلفیں الجھی باتیں آنکھ میں شوخی لب پہ تبسم

کھلتی کلیاں جھومتی ڈالی حشر سراپا کیا نہیں دیکھا

بزم چراغاں جھوٹی خوشیاں نخوت ساقی تشنہ دہانی

گردش ساغر عالم مستی تندیٔ صبا کیا نہیں دیکھا

پھول سی باہیں لرزاں سینہ سانس الجھتے بھولی باتیں

نیچی نظریں پہلی لغزش دل کا تقاضا کیا نہیں دیکھا

یاورؔ ہم کو پا نہ سکو گے جیسے اب ہیں ایسے کب تھے

دل کی نزاکت جرم محبت کفر تمنا کیا نہیں دیکھا

آج بھی یاورؔ ہنستے ہنستے آنکھ میں آنسو آ جاتے ہیں

درد کی موجیں خون کی لہریں آگ کا دریا کیا نہیں دیکھا

(972) ووٹ وصول ہوئے

Your Thoughts and Comments

Bhigi Palken Shauq Ka Aalam Waqt Ka Dhaara Kya Nahin Dekha In Urdu By Famous Poet Yawar Abbas. Bhigi Palken Shauq Ka Aalam Waqt Ka Dhaara Kya Nahin Dekha is written by Yawar Abbas. Enjoy reading Bhigi Palken Shauq Ka Aalam Waqt Ka Dhaara Kya Nahin Dekha Poem on Inspiration for Students, Youth, Girls and Boys by Yawar Abbas. Free Dowlonad Bhigi Palken Shauq Ka Aalam Waqt Ka Dhaara Kya Nahin Dekha by Yawar Abbas in PDF.