کفر سے یہ جو منور مری پیشانی ہے

کفر سے یہ جو منور مری پیشانی ہے

ظاہر اس سے بھی مرا جذبۂ ایمانی ہے

یہ جو یکسوئی میسر ہے مجھے شام و سحر

سر بسر میرے لیے وجہ پریشانی ہے

اس کنارے پہ فقط میں ہوں اکیلا خالی

نہر کے دوسری جانب مری حیرانی ہے

خاک اڑتی ہے تو ہر سو مرے اندر ورنہ

جس طرف میں ہوں وہاں چاروں طرف پانی ہے

جو سیہ فام ہے اندر کی طرف سے جتنا

اس کے چہرے پہ یہاں اتنی ہی تابانی ہے

موسموں سے ابھی مایوس نہیں ہوں یکسر

اک ہوا ہے جو ابھی میری طرف آنی ہے

دل میں کیا صورت حالات ہے کھلتا نہیں کچھ

کیا کمی ہے یہاں کس شے کی فراوانی ہے

یہ عجب طرح کا بازار سخن ہے کہ جہاں

میں ہی نایاب ہوں اور میری ہی ارزانی ہے

آزمائش میں ہی رکھتا ہوں سدا خود کو ظفرؔ

میری مشکل ہی سراسر مری آسانی ہے

(1063) ووٹ وصول ہوئے

Your Thoughts and Comments

Kufr Se Ye Jo Munawwar Meri Peshani Hai In Urdu By Famous Poet Zafar Iqbal. Kufr Se Ye Jo Munawwar Meri Peshani Hai is written by Zafar Iqbal. Enjoy reading Kufr Se Ye Jo Munawwar Meri Peshani Hai Poem on Inspiration for Students, Youth, Girls and Boys by Zafar Iqbal. Free Dowlonad Kufr Se Ye Jo Munawwar Meri Peshani Hai by Zafar Iqbal in PDF.