Sukhi Zamin Ko Yaad Ke Baadal Bhigo Gae

sukhi zamin ko yaad ke baadal bhigo gae

palkon ko aaj bite hue pal bhigo gae

aansu falak ki aankh se Tapke tamam raat

aur subh tak zamin ka aanchal bhigo gae

mazi ke abr TuT ke barse kuchh is tarah

muddat se KHushk aankhon ke jangal bhigo gae

waqt-e-safar judai ke lamhat-e-muzmahil

ek bewafa ki aankh ka kajal bhigo gae

main manzaron mein khoya hua parbaton ke tha

aa kar kisi ki yaad ke baadal bhigo gae