وہ بحر و بر میں نہیں اور نہ آسماں میں ہے

وہ بحر و بر میں نہیں اور نہ آسماں میں ہے

جو راز زیست مرے شوق بیکراں میں ہے

مجھے قرار بجز شوق‌‌‌ بے قرار نہیں

سکون زیست مجھے شوخئ بتاں میں ہے

مجھے قبول نہیں ایسا راز سر بستہ

جو چشم عقل سے پوشیدہ لا مکاں میں ہے

مری حیات فقط جستجوئے پیہم ہے

مرا مقام ستاروں کے کارواں میں ہے

میں آسماں میں ستاروں کی سیر کرتا ہوں

یہ کیا سرور ترے سنگ آستاں میں ہے

مرے وجود میں پنہاں ہے گوہر یکتا

مرا وجود نہاں بحر بیکراں میں ہے

چمن میں جبکہ نشیمن بنا چکا ہوں میں

عجب طرح کی چمک چشم آسماں میں ہے

مرے کلام سے آیا ہے برگ گل پہ نکھار

مرے نفس کی مہک سارے گلستاں میں ہے

وہ لطف زیست جو ہے تند و تیز طوفاں میں

وہ شاخ گل پہ نہیں اور نہ آشیاں میں ہے

وہ سوز و ساز حقیقت سے آشنا ہوگی

وہ زندگی جو ہمہ وقت امتحاں میں ہے

ہر ایک لحظہ ہے اک تازہ ولولہ درکار

عجب طرح کا مزہ بحر بیکراں میں ہے

وہ میری قوت ایماں کی اک علامت ہے

جو شور حشر بپا بزم دشمناں میں ہے