پر نور خیالوں کی برسات تری باتیں

پر نور خیالوں کی برسات تری باتیں

ہر شخص یہ کہتا ہے نغمات تری باتیں

رخسار حسیں درپن آنکھوں میں حیا روشن

کردار ترا صندل جذبات تری باتیں

سمٹے تو دل عاشق پھیلے تو جہاں کم ہے

صدیوں کو بنا دے گی لمحات تری باتیں

اب خود سے بھی ملنے کی فرصت ہی کہاں ہم کو

ہر شام تری محفل ہر رات تری باتیں

نظریں جو اٹھا دو تم تارے بھی چمک جائیں

اور چاند کو دے جائے سوغات تری باتیں

آ جاتی ہے ملنے کو ہر رات ہمیں ذاکرؔ

پھولوں کی ردا اوڑھے بارات تری باتیں