Ye KHwab Sare

ye KHwab sare

abhi jo aankhon mein so rahe hain

ye jag uTThe to kya karoge

to kya karoge jo KHwab sare

tumhaari aankhon se bahar aa kar

taKHil ki be-karan faza mein

kisi sunahre hasin lamhe ko qaid kar len

kisi ki zulfon mein phul Tanke

kis ke honTon pe gungunaen

kisi ke shanon pe hath rakh den

kisi ke pahlu mein baiTh jaen

to kya karoge

to kya karoge jo KHwab sare

palaT ke mazi mein lauT jaen

har ek manzar har ek paikar

har ek kucha har ek Dagar par

junun-ba-daman tumhein nachaen

tumhaari wahshat ko aazmaen

kisi khanDar ki shikasta chaukhaT pe baiTh jaen

siyah taqon pe momi shamen

tumhaari yaadon mein jhilmilaen

koi hayula koi sarapa

tumhein pukare

tumhaari aankhon pe hath rakh de

gulab-Dali ka haar koi

tumhaare talwon mein gudgudae

laharya aanchal ka koi TukDa

hawa mein uDta hua sa aae

tumhaare ashkon se bhig jae

to kya karoge

to kya karoge jo KHwab sare

tumhaari aankhon se ashk ban kar

tumhaare daman pe phail jaen

lahu rulaen

to kya karoge jo KHwab sare

palaT ke mazi mein lauT jaen!