Sham-e-haq Shoabada-e-harf Dikha Kar Le Jae

sham-e-haq shoabada-e-harf dikha kar le jae

kahin tujh ko hi na tujh se koi aa kar le jae

pahne phirte hain jo pairahan-e-suqraat-o-masih

un ka bahrup na dil tera lubha kar le jae

tu chaDhawa to nahin hai ki koi sehar-maqal

su-e-maqtal tujhe lafzon mein saja kar le jae

tu koi sukha hua patta nahin hai ki jise

jis taraf mauj-e-hawa chahe uDa kar le jae

teri aqdar par-e-kah nahin hain ki junhi

koi lahar uTThe unhen sath baha kar le jae

log to tak mein hain aisa na ho koi tujhe

KHud tere KHauf ki zanjir pinha kar le jae

ja-ba-ja shola-bayan charb-zaban tak mein hain

koi tujh ko bhi na baaton mein laga kar le jae

lafz tiron ki tarah waz sinan ke manind

dil-e-wahshi ko kahan koi bacha kar le jae