Dinon Mein Din The Shabon Mein Shaben PaDi Hui Thin

dinon mein din the shabon mein shaben paDi hui thin

sabhi kahaniyan ek taq mein paDi hui thin

azan gunji to mehrab mein koi bhi na tha

bas ek rehl pe kuchh aayaten paDi hui thin

sunai deta hai ab bhi muqaddas aag ke gird

wo lahn jis mein kai hairaten paDi hui thin

mujhe nawaza to peshani par likha us ne

wo nam jis mein sabhi nisbaten paDi hui thin

charagh aundhe paDe the zamin par sare

aur un ke pas mein un ki lawen paDi hui thin

na barg-o-bar hi lae na saeban hue 'turk'

hamari shaKHon pe kaisi girhen paDi hui thin