ہم کہاں آ گئے

ہم کہاں آ گئے

سارے بے سمت ہیں

قافلے کارواں سارباں

ایک سیلاب آدم رواں چار سو

اک تگ و تاز کار جہاں

آسماں سے پرے سیر سیارگاں

اور زمیں دوز پہنائیوں میں

نگاہوں کی حیرانیاں

اب کہیں بھی نہیں

ماتم مرگ بے چارگاں

ہر عدالت میں انصاف کی عرضیاں

باطلوں کی طرفداریاں

پھر اٹھا لے گئے بانوئے‌ بے ردا

سارے چپ چاپ ہیں

کوئی پرساں نہیں

گریۂ طفل بے چارگاں

کوئی سنتا نہیں

خواب بیمار آنکھوں میں مرتے ہوئے

خودکشی چار سو بین کرتی ہوئی

یہ مری ارض جنت نشاں

جو پکاری گئی

قبلۂ عارفاں معبد نوریاں

کوچۂ دلرباں بستیٔ عاشقاں

مقتل حرف و صوت و صدا بن گئی

اب لہو رنگ ہیں سارے تشنہ‌ لباں

صادق و صادقہ

ناز بردار آشفتگاں