Phul Ka Khilna Bahut Dushwar Hai

phul ka khilna bahut dushwar hai

mausam-e-gul aaj-kal bimar hai

be-wasila baat ban sakti nahin

mil gai kashti to dariya par hai

aansuon ka aur matlab kuchh nahin

muKHtasar si surat-e-izhaar hai

dosti ka raaz ifsha kar gai

dushmani bhi ek baDa kirdar hai

hum safine ke liye ek bojh hain

hum agar Dube to beDa par hai

zindagi ki razm-gahon mein 'zuhair'

sarfaroshi aaKHiri tyauhaar hai