Rakkha Nahin Ghurbat Ne Kisi Ek Ka Bharam Bhi

rakkha nahin ghurbat ne kisi ek ka bharam bhi

mai-KHana bhi viran hai kalisa bhi haram bhi

luTa hai zamane ne mera besh bhi kam bhi

chhina tha tujhe chhin liya hai tera gham bhi

be-ab hua ab to mera dida-e-nam bhi

ai gardish-e-alam tu kisi moD pe tham bhi

sun ai but-e-jaan-dar but-e-simbar ai sun

toDe na gae hum se to patthar ke sanam bhi

main wasl ki bhi kar na saka shiddat-e-gham kam

aaya na kisi kaam tere hijr ka sam bhi

diwar-e-sukun baiTh gai shiddat-e-nam se

barsa hai mere ghar pe agar abr-e-karam bhi

tanhai na puchh apni ki sath ahl-e-junun ke

chalte hain faqat chand qadam rah ke KHam bhi

sahra-e-gham-e-jaan mein bagulon se bacha kaun

miT jaenge ai dost tere naqsh-e-qadam bhi

sunte hain chamakta hai wo chand ab bhi sar-e-baam

hasrat hai ki bas ek nazar dekh len hum bhi