تیرا انداز سخن سب سے جدا لگتا ہے

تیرا انداز سخن سب سے جدا لگتا ہے

بربط دل پہ کوئی نغمہ سرا لگتا ہے

وہ دیا جس سے کہ روشن ہو چراغ ہستی

غور سے دیکھیں ہواؤں میں گھرا لگتا ہے

ہم ہیں آغوش جنوں میں تو تعجب کیسا

وہ بھی تو دشمن ارباب وفا لگتا ہے

گر نہیں جلوہ گری بزم طرب میں پھر بھی

تیری خوشبو سے وہاں تیرا پتا لگتا ہے

دونوں ہاتھوں سے چھپانا ترے چہرے کا مجھے

سوچتا ہوں تو ترا دست دعا لگتا ہے

جس کا ملنا بھی قیامت سے نہیں کم جاویدؔ

اس کا ملنا بھی مجھے روز جزا لگتا ہے