Saloni Sardiyon Ki Nazm

purane boot hain tasme khule hain

abhi miTTi ke chehre un-dhule hain

sharaben aur mashkiza sahar ka

abhi hai jism pakiza gajar ka

sute chehre pe istehza ka mausam

lahu nabzon se KHali kar gaya hai

gale mein mulk ke tawiz Dalo

bidesi barchhiyon se Dar gaya hai

ghazal dalan mein rakkhi hai main ne

mahak hai sangtare ki qash jaisi

ye kaisi mai hai jo chakkhi hai main ne

mujhe ushshaq ye kahte hain 'amir'

bahut tanha sisakte dahr mein ho!

baDe shaer ho chhoTe shahr mein ho

fareb-e-asr se madhosh kamra

nigoDi titliyon se bhar gaya hai

samundar pinDliyon tak aate aate

kisi patthar ki sil par mar gaya hai

saloni sardiyon se jhankte hain

wo abru kashtiyon ko hankte hain

sileTi baadalon ka ye sahifa

meri muTThi mein paDhta hai wazifa

main rota hun to ro paDte hain tair

mere hujre mein kam aate hain zaer

ye poren nur-bafi kar rahi hain

mohabbat ko ghilafi kar rahi hain

tafaKHur mein hai do honTon ka KHam bhi

abhi rakkha nahin main ne qalam bhi

(641) Peoples Rate This

Your Thoughts and Comments

Saloni Sardiyon Ki Nazm In English By Famous Poet Aamir Suhail. Saloni Sardiyon Ki Nazm is written by Aamir Suhail. Read famous Poem Saloni Sardiyon Ki Nazm for youth and Student by Aamir Suhail. Free Download Saloni Sardiyon Ki Nazm in PDF.