Itna To Dosti Ka Sila Dijiye Mujhe

itna to dosti ka sila dijiye mujhe

apna samajh ke zahr pila dijiye mujhe

uTThe na ta-ki aap ki jaanib nazar koi

jitni bhi tohmaten hain laga dijiye mujhe

kyun aap ki KHushi ko mera gham kare udas

ek talKH hadisa hun bhula dijiye mujhe

sidq-o-safa ne mujh ko kiya hai bahut KHarab

makr-o-riya zarur sikha dijiye mujhe

main aap ke qarib hi hota hun har ghaDi

mauqa kabhi paDe to sada dijiye mujhe

har chiz dastiyab hai bazar mein 'adam'

jhuTi KHushi KHarid ke la dijiye mujhe