Kaise Rakhenge Sar Pe Kisi Ka Udhaar Hum

kaise rakhenge sar pe kisi ka udhaar hum

qarz-e-wafa mein karte hain sar ka shumar hum

afsos isi chaman mein hue be-wiqar hum

jis ko ki chahte rahe diwana-war hum

alfaz madah-KHwan the qalam the bike hue

kaise tarash lete koi shah-kar hum

milna hamara KHak mein zaea na jaega

de jaenge chaman ko shuur-e-bahaar hum

koi sipar bacha na sakegi huzur ko

talwar se suKHan ki karenge jo war hum

ai zindagi na hum se chhupa raaz-e-zindagi

har sans mein hain tere hi aaina-dar hum

Dalen ab ek aur riwayat ki dagh-bel

dushman pe ai 'niyaz' karen e'tibar hum