Ye Saneha Bhi Ho Gaya Hai Raste Mein

ye saneha bhi ho gaya hai raste mein

jo rahnuma tha wahi kho gaya hai raste mein

kisi bhi aabla-pa ko na mil saki taskin

ajib KHar koi bo gaya hai raste mein

itab-e-jaan hui gard-e-safar kisi ke liye

kisi ko abr-e-karam dho gaya hai raste mein

hudi ki lai karo maddham ai qafile walo

thakan se chur koi so gaya hai raste mein

musafiran-e-wafa ki koi KHabar na mili

na jaane kaun kidhar ko gaya hai raste mein

rahega sath kahan tak ye dekhna hai mujhe

wo ham-suKHan to mera ho gaya hai raste mein