Rah BhaTka Hua Insan Nazar Aata Hai

rah bhaTka hua insan nazar aata hai

teri aankhon mein to tufan nazar aata hai

pas se dekho to malum paDega tum ko

kaam bas dur se aasan nazar aata hai

is ko malum nahin apne watan ki sarhad

ye parinda abhi nadan nazar aata hai

bas wahi bhumi pe insan hai kahne laeq

jis ko har shaKHs mein bhagwan nazar aata hai

aai jis rose se beTi pe jawani us ki

bap har waqt pareshan nazar aata hai

jab se tum chhoD gae mujh ko akela 'amabar'

shahr sara mujhe viran nazar aata hai