Sirf Karb-e-ana Diya Hai Mujhe

sirf karb-e-ana diya hai mujhe

zindagi ne bhi kya diya hai mujhe

muskuraate hue bhi Darta hun

gham ne buzdil bana diya hai mujhe

jis tarah ret par ho naqsh koi

yun hawa ne miTa diya hai mujhe

main use dil-lagi samajhta tha

tu ne sach-much bhula diya hai mujhe

yarab is be-hison ke shahr mein kyun

dil-e-dard-ashna diya hai mujhe

wo bhi ThanDi hawa ka jhonka tha

jis ne yaksar jala diya hai mujhe

us ne rakkha hai be-tarah masruf

rose hi gham naya diya hai mujhe

aaj mere hi dil ne ai 'abid'

apna dushman bana diya hai mujhe