Nurse

shahr ke haspatal mein us ko

ek hafta hua hai aae hue

sat number ka kana Thekedar

kanpta tha jo dekh kar nashtar

us ke zaKHmon pe aaj kal wo KHud

apne hathon se phae rakhti hai

langDa budh-sen gyarah number ka

us ki aankhon mein Dal kar aankhen

ghunT kaDwi dawa ke pita hai

panch number ka diq-zada shaer

dekh kar us ko sher kahta hai

ward ke kitne hi marizon se

us ne wada kiya hai shadi ka

ward ke kitne hi marizon ko

tandurusti bahaal hone par

us ke ham-rah ghar basana hai!