Chand Ojhal Ho Gaya Har Ek Sitara Bujh Gaya

chand ojhal ho gaya har ek sitara bujh gaya

aandhiyan aisi chalin phir dil hamara bujh gaya

ab to hum hain aur samundar aur hawaen aur raat

dur se karta tha jhilmil ek kinara bujh gaya

ghurte hain log baiThe kya KHalaon mein ki ab

har ishaara bujh gaya hai har sahaara bujh gaya

har nazar ke samne ab be-karan pahli si rit

jagmagata baat karta dasht sara bujh gaya

jam gai hai barf kaisi har taraf logo yahan

rakh tak ThanDi paDi kya kya sharara bujh gaya

shahr chup hain raste KHamosh hain chehre udas

bas bagule uD rahe hain har nazara bujh gaya