Zinda Rahne Ka Taqaza Nahin ChhoDa Jata

zinda rahne ka taqaza nahin chhoDa jata

hum ne tujh ko nahin chhoDa nahin chhoDa jata

ain mumkin hai tere hijr se mil jae najat

kya karen yar ye sahra nahin chhoDa jata

chhoD jati hai badan ruh bhi jate jate

qaid se koi bhi pura nahin chhoDa jata

is qadar TuT ke milne mein hai nuqsan ki jab

khet pyase hon to dariya nahin chhoDa jata

chhoDna tujh ko meri jaan hai bahut baad ki baat

hum se to shahr bhi tera nahin chhoDa jata

raushni KHub hai lekin mere hayyun-o-qayyum

yar andhere mein akela nahin chhoDa jata