Pyare Pyare Yugon Mein Aae Pyare Pyare Log

pyare pyare yugon mein aae pyare pyare log

is bechaare daur mein janme hum bechaare log

har chehre par khinchi hui hain thakan ki rekhaen

jit ka ek pal khoj rahe hain haare haare log

bhor bhai phir sanjh bhai phir bhor bhai phir sanjh

samay chakkar mein bandhe hue hain sanjh sakare log

aati hai itihas se un ke bhant bhant ki bas

har miTTi ko sungh chuke hain ye banjare log

had-bandi ki rekha toDen aao gale lag jaen

idhar tumhaare log khaDe hain udhar hamare log

is sawan mein har aangan mein dukhon ki hai barsat

ab ke koi bach nahin paya bhige sare log