Ajib Karb Sa Hai Zindagi Ke Chehre Par
ajib karb sa hai zindagi ke chehre par
andhera jaise kisi raushni ke chehre par
yaqin kaise karun main tumhaari baaton ka
ki qatre ashk ke hain shoalagi ke chehre par
chhupa mila mujhe gham ki siyah raaton mein
jise main DhunD raha hun KHushi ke chehre par
zamane-bhar mein hue hadse jo roz-o-shab
numayan hain wo meri shairi ke chehre par
jo ek KHulus tha napaid ho gaya 'ahsan'
ghubar-e-bughz hai ab dosti ke chehre par
Ahsan Imam Ahsan 
(1341) Peoples Rate This