Hijr Ek Husn Hai Is Husn Mein Rahna Achchha

hijr ek husn hai is husn mein rahna achchha

chashm-e-be-KHwab ko KHun-nab ka gahna achchha

koi tashbih ka KHurshid na talmih ka chand

sar-e-qirtas laga harf-e-barhana achchha

par utarne mein bhi ek surat-e-gharqabi hai

kashti-e-KHwab rah-e-mauj pe bahna achchha

yun nasheman nahin har roz uThae jate

usi gulshan mein usi Dal pe rahna achchha

be-dili shart-e-wafa Thahri hai mear to dekh

main bura aur mera ranj na sahna achchha

dhup us husn ki yak-lahza mayassar to hui

phir na ta-umr laga sae mein rahna achchha

dil jahan baat kare dil hi jahan baat sune

kar-e-dushwar hai us tarz mein kahna achchha