Baad Muddat Ke Khula Jauhar-e-nayab Mera

baad muddat ke khula jauhar-e-nayab mera

jo andhere mein tha raushan hua wo bab mera

main zamin walon ki aankhon mein bhara hun lekin

aasman walon ne dekha hai koi KHwab mera

itr-afshani-e-qurbat se thi mamur faza

jazba-e-qatra-e-KHun kab hua sairab mera

kitne dariyaon pe tha kali ghaTaon ka julus

ek ek bund ka pyasa raha talab mera

mutmain ho gae ahbab mere KHush hai zamin

ek nai samt jo beDa hua gharqab mera

sab ke honTon pe gulabon ka tabassum tha 'saba'

mutmain main hun ki har zaKHm hai shadab mera