Weapons Of Mas Destruction

koi hai

koi baghdad ki fariyaad sunta hai

koi hoga jise aawaz aati ho

kisi dushman ke Tapon ki

dhamakon ki

iraqi kokh ko yun raundte hain

tank dushman ke

ki zaKHm KHun thukne lage baghdadi badan ke

furaat-o-dajla ke pani ko kis ne KHak kar Dala

ki dushman ne meri jannat ko bhi napak kar Dala

alf-laila shahzadi ke kapDe phaD Dale hain

farangi ne mere bachpan ke qisse phaD Dale hain

badan jalte hue bachchon ki ye bujhti hui aankhen

iraqi aasman se sar uTha kar bas yahi puchhen

ababilen utarti kyun nahin dikhtin zaminon par

hamare dushmanon ke sard sinon par

wo bachche jaante kab hain

ababilen shahr se dur apne ghonslon mein

sair ho kar nind mein gum hain

wo bachche jaante kab hain

ababilen ababilen nahin hain

main aur tum hain

wo bachche jaante kab hain

ki un ke KHun ke qatre hamari sarhadon tak

aate aate sukh jate hain

hamari had hai aur sarhad bhi hai hakim ke hukm se

KHuda ka hukm hai chhoTa yahan zalim ke hukm se

sharabon mein Dubo di hain mere hakim ne shamshiren

jila di hain sabhi aaba ki taswiren

musalmanon ki taqdiren

mere bachcho

mere baghdad ke sine pe paDe adh-mare bachcho

koi isa na aaega masihai koi le kar

tumhaari hum se jo ummid hai

wo be-samar hai

hamari apni zamin hai

hamara apna bhi ghar hai

tumhaari aas andhi hai tumhaara KHwab kala hai

hamare daur ki mariyam ne isa mar Dala hai

(541) Peoples Rate This

Your Thoughts and Comments

Weapons Of Mas Destruction In English By Famous Poet Ali Imran. Weapons Of Mas Destruction is written by Ali Imran. Read famous Poem Weapons Of Mas Destruction for youth and Student by Ali Imran. Free Download Weapons Of Mas Destruction in PDF.