Man Ka KHwab

main soi jo ek shab to dekha ye KHwab

baDha aur jis se mera iztirab

ye dekha ki main ja rahi hun kahin

andhera hai aur rah milti nahin

larazta tha Dar se mera baal baal

qadam ka tha dahshat se uThna muhaal

jo kuchh hausla pa ke aage baDhi

to dekha qatar ek laDkon ki thi

zamurrad si poshak pahne hue

diye sab ke hathon mein jalte hue

wo chup-chap the aage pichhe rawan

KHuda jaane jaana tha un ko kahan

isi soch mein thi ki mera pisar

mujhe is jamaat mein aaya nazar

wo pichhe tha aur tez chalta na tha

diya us ke hathon mein jalta na tha

kaha main ne pahchan kar meri jaan

mujhe chhoD kar aa gae tum kahan

judai mein rahti hun main be-qarar

piroti hun har roz ashkon ke haar

na parwa hamari zara tum ne ki

gae chhoD achchhi wafa tum ne ki

jo bachche ne dekha mera pech-o-tab

diya us ne munh pher kar yun jawab

rulati hai tujh ko judai meri

nahin is mein kuchh bhi bhalai meri

ye kah kar wo kuchh der tak chup raha

diya phir dikha kar ye kahne laga

samajhti hai tu ho gaya kya ise?

tere aansuon ne bujhaya ise!

(7028) Peoples Rate This

Your Thoughts and Comments

Man Ka KHwab In English By Famous Poet Allama Iqbal. Man Ka KHwab is written by Allama Iqbal. Read famous Poem Man Ka KHwab for youth and Student by Allama Iqbal. Free Download Man Ka KHwab in PDF.