Saba Ki Baat Sunen Phul Se Kalam Karen

saba ki baat sunen phul se kalam karen

bahaar aae to hum bhi junun mein nam karen

na koi ret ka Tila na saya-dar daraKHt

rah-e-wafa mein musafir kahan qayam karen

qadam qadam pe mile bolte hue patthar

tumhi batao ki ab kis se hum kalam karen

mahak uDati hui aai hai nasim-e-bahaar

kaho ab ahl-e-chaman se ki fikr-e-dam karen

hamari rah mein diwar ban gai duniya

tumhaare shahar mein kis kis ko hum salam karen

wo jin ke dam se zamane ke KHwab rangin hain

hamari nind bhi aa kar kabhi haram karen

dhuan dhuan si faza shahr-e-dil ki hai 'parwaz'

nae charagh jalane ka intizam karen