Main Use Dekh Rahi Hun BaDi Hairani Se

main use dekh rahi hun baDi hairani se

jo mujhe bhul gaya is qadar aasani se

KHud se ghabra ke yahi kahti hun auron ki tarah

KHauf aata hai mujhe shahr ki virani se

ab kisi aur saliqe se satae duniya

ji badalne laga asbab-e-pareshani se

tan ko Dhanpe hue phirte hain sabhi log yahan

sharm aati hai kise soch ki uryani se

ai falak chhoD de be-yar-o-madadgar hamein

dam ghuTa jata hai ab teri nigahbani se

main use KHwab samajh sakti hun lekin 'amabar'

lams jata nahin us ka meri peshani se