Qurratul-ain-haidar

main ne dekhi hain kisi chehre mein aisi aankhen

jin mein mere kai anjaane sawalon ke jawab

aisi aasani se sachchai ke dar kholte hain

aasmanon mein zaminon ke sanam bolte hain

main ne jaana hai ki lafzon ke tilismi dhage

kaise tariKH ko unwan nae dete hain

kaise aa milte hain sadiyon ki judai ke asir

kis tarah KHwab nae aks saja lete hain

yunhi is hairat-e-hasti ki panahon mein kahin

zindagi sab ke liye apne hunar kholti hai

han magar KHas qadam uThte hain rahon mein tabhi

ye zamin chand sitaron se udhar Dolti hai

aur is samt jo dekhun wo nazar bolti hai

main bhala kaun hun kirdar hun kis KHake ka

mere hone se jahan bhar ko musibat kya hai

kaise dozaKH ka pata mangti hun us ke ewaz

meri hasti ki zamane mein haqiqat kya hai

main ne dekha hai mera kal kisi guzre pal mein

main ne jaana hai kahan mera qadam Thahra hai

us ke imroz ko dekha hai to ye ilm hua

meri taqdir mere farda mein rakkha kya hai