Unki Be-ruKHi Mein Bhi Iltifat Shamil Hai

un ki be-ruKHi mein bhi iltifat shamil hai

aaj kal meri haalat dekhne ke qabil hai

qatl ho to mera sa maut ho to meri si

mere sogwaron mein aaj mera qatil hai

har qadam pe nakaami har qadam pe mahrumi

ghaaliban koi dushman doston mein shamil hai

muztarib hain maujen kyun uTh rahe hain tufan kyun

kya kisi safine ko aarzu-e-sahil hai

sirf rahzan hi se kyun 'amir' shikwa ho

manzilon ki rahon mein rahbar bhi hail hai