Wo Ek Lafz Jo Be-sada Jaega

wo ek lafz jo be-sada jaega

wahi muddaton tak suna jaega

koi hai jo mere taaqub mein hai

mujhe mera chehra dikha jaega

wo ek shaKHs jo dushman-e-jaan sahi

magar phir bhi apna kaha jaega

jalegi koi mishal-e-jaan abhi

magar phir andhera sa chha jaega

nafi-e-jurat-e-haq-numai sahi

magar kab kisi se kaha jaega

yahan ek shajar muntazir sa bhi hai

ab aaKHir kahan tak chala jaega

main wo mishal-e-nim-shab hun 'amir'

jise kal ka suraj bujha jaega