UTh

uTh ki KHurshid aasman par jalwa-afshan ho gaya

uTh ki goya teri bedari ka saman ho gaya

uTh ki pahuncha chahte hain ghair manzil ke qarib

tu badalta hai abhi tak karwaTen ai bad-nasib

uTh ki jidd-o-jahd se ho teri hasti kaamyab

KHwab aaKHir KHwab hai kab tak rahega mahw-e-KHwab

uTh ki duniya ko tere zauq-e-talab se kaam hai

zindagi kya hai faqat sai-e-amal ka nam hai

uTh ki be-raunaq nazar aata hai ab sahn-e-chaman

bulbul-o-tuti pe sabqat le gae zagh-o-zaghan

uTh ki jina hai to qanun-e-KHuda par ghaur kar

laisa-lil-insan-illa-ma-saa par ghaur kar

uTh ki duniya tak rahi hai pai-ba-pai teri taraf

dekh chashm-e-ghaur se ek bar tu apni taraf

uTh ki tere hath mein iqan ki shamshir hai

tu agar chahe to ye duniya tera naKHchir hai

uTh ki be-zauq-e-amal ye tegh bhi be-kar hai

to bhi teri zindagi bhi naqsh-bar-diwar hai