Ab Gham Ka Koi Gham Na KHushi Ki KHushi Mujhe

ab gham ka koi gham na KHushi ki KHushi mujhe

aaKHir ko ras aa hi gai zindagi mujhe

wo qatl kar ke mujh ko pasheman hue to kya

lauTa sakenge phir na meri zindagi mujhe

sare jahan mein hoti hai amn-o-aman ki baat

lekin nazar na aai kahin aashti mujhe

neza uThae phirti hai har rah mein qaza

har moD par hiras mili zindagi mujhe

main ghunT ghunT jam se bahlaun ji ko kya

be-KHauf kash kar hi de tishna-labi mujhe

ek lazzat-e-gunah thi kya lazzat-e-gunah

ta-umr ras aai na phir bandagi mujhe

kuchh aarzu nahin ki farishta banun 'anis'

kafi hai han jo log kahen aadmi mujhe