Kitab-e-ishq Ke Jo Moatabar Risale Hain

kitab-e-ishq ke jo mo'atabar risale hain

unhin mein husn ke kuchh mustanad hawale hain

ba-zoam-e-jabr tasarruf mein jin ke duniya thi

wo aaj rahm ki taKHti gale mein Dale hain

na jaane kaun si aafat ka pesh-KHema hai

ye barg sabz hawaon ne kyun uchhaale hain

KHabar uDao ki peshani-e-siyasat par

hum apne faqon ki tafsil likhne wale hain

panah mujh ko mili aise shahr mein 'anjum'

jahan pe aaj bhi tahzib ke ujale hain