Suno Kuchh Dida-e-nam Bolte Hain

suno kuchh dida-e-nam bolte hain

jo chup the aaj wo gham bolte hain

kaho sanson mein hai aawaz kis ki

ye tum kahte ho ya hum bolte hain

tumhaare husn ki KHushbu gulon mein

tumhaara nam mausam bolte hain

kisi ki bhi kabhi sunte nahin wo

magar un se kaho hum bolte hain

tumhaara rag ghungru ke labon par

tumhaare honT sargam bolte hain

tumhaare husn ka jadu hai kitna

tumhaari zulf ke KHam bolte hain

wo dekha hai tumhaari chashm-e-nam mein

jise hum saghar-e-jam bolte hain

use hum ne kahin dekha nahin hai

jise ahbab hamdam bolte hain

har ek sunta hai un ki baat 'asghar'

jo sunte hain bahut kam bolte hain