Zard Patton Pe Mera Nam Likha Hai Usne

zard patton pe mera nam likha hai us ne

sabz KHwabon ka ye anjam likha hai us ne

koi milta nahin jo paDh ke suna de mujh ko

barg-e-gul par koi paigham likha hai us ne

sach hai tanhai mein insan sanak jata hai

roz-e-raushan ko siyah-fam likha hai us ne

mehr-o-mah dip hua abr samundar KHushbu

kis ki taqdir mein aaram likha hai us ne

sar uchhalte hain zaban kaTti hai jis mein 'anjum'

mere zimme wahi ek kaam likha hai us ne