Sadiyon Ko Behaal Kiya Tha
sadiyon ko behaal kiya tha
ek lamhe ne sawal kiya tha
miTTi mein taswiren bhar ke
kuza-gar ne kamal kiya tha
bahar bajti shahnai ne
andar kitna niDhaal kiya tha
jurm faqat itna tha main ne
ek raste ko bahaal kiya tha
KHushbu jaisi raat ne mera
apne jaisa haal kiya tha
ek sunahre hijr ne mujh se
kitna sabz visal kiya tha
Asima Tahir 
(698) Peoples Rate This