Dil Ki Dahliz Pe Dilbar Aaya

dil ki dahliz pe dilbar aaya

pyas ke dar pe samundar aaya

chalte chalte teri KHushbu aai

main ye samjha ki tera ghar aaya

dhup mein chhanw numudar hui

kaun aaKHir sar-e-mahshar aaya

asl mein thi wo hawai aahaT

main baDi tezi se bahar aaya

thin KHataen to sarasar dil ki

zad mein aaya to mera sar aaya

chhuT kar tujh se kahin ja na mili

lauT kar phir tere dar par aaya

us ko lauTa diye sab us ke KHutut

hae nadan ye kya kar aaya

yar aaya ki na aaya 'atib'

nama-e-yar barabar aaya