Waqt Ne LuTe Hain Hasti Ke KHazane Kitne

waqt ne luTe hain hasti ke KHazane kitne

KHak ka Dher hue qasr na-jaane kitne

KHwab ehsas nazar yaad tasawwur dhaDkan

main ne tere liye rakkhe hain Thikane kitne

aaj manzil pe pahunch kar mujhe ehsas hua

rah mein chhuT gae dost purane kitne

dil wo panchhi hai kabhi dam mein aata hi nahin

chuk jate hain nigahon ke nishane kitne

jab bhi tabir ki aankhon se milain aankhen

ruh ko chhed gae KHwab suhane kitne

daman-e-sabr na chhoDenge kabhi ahl-e-wafa

tum banaoge meri jaan bahane kitne

kya bataun main rah-e-sher-o-suKHan mein ai 'atib'

naqsh chhoDe hain meri fikr-e-rasa ne kitne