Rahguzaron Mein Raushni Ke Liye
rahguzaron mein raushni ke liye
le ke nikle hain aandhiyon mein diye
zaiqa talKH hai mohabbat ka
aadmi zahr-e-gham piye na piye
dil mein yaadon ke rat-jage jaise
TimTimate hun marghaTon ke diye
dil mein tufan hain chhupae hue
hum to baiThe hain apne honT siye
koi tujh sa nazar nahin aata
dil ne sau rang intiKHab kiye
dar-ba-dar shahr mein phire yaro
apne kandhe pe apni lash liye
dil ki dil mein rahen tamannaen
aankhon aankhon mein kitne ashk piye
jaan pyari hamein bhi thi 'ayyub'
apni KHatir magar kabhi na jiye
Ayub Rumani 
(989) Peoples Rate This
Fatal error: Uncaught PDOException: SQLSTATE[42S22]: Column not found: 1054 Unknown column 'id' in 'ORDER BY' in /home/darsaal/htdocs/darsaal.com/poetry/poem_en.php:544 Stack trace: #0 /home/darsaal/htdocs/darsaal.com/poetry/poem_en.php(544): PDOStatement->execute() #1 {main} thrown in /home/darsaal/htdocs/darsaal.com/poetry/poem_en.php on line 544