Ye Mashwara Baham UTThe Hain Chaara-ju Karte

ye mashwara baham uTThe hain chaara-ju karte

ki ab mariz ko achchha tha qibla-ru karte

zaban ruk gai aaKHir sahar ke hote hi!

tamam raat kaTi dil se guftugu karte

sawad-e-shahr-e-KHamoshan ka dekhiye manzar!

suna na ho jo KHamoshi ko guftugu karte

tamam ruh ki lazzat isi pe thi mauquf

ki zindagi mein kabhi tum se guftugu karte

jawab hazrat-e-naseh ko hum bhi kuchh dete

jo guftugu ke tariqe se guftugu karte

pahunch ke hashr ke maidan mein haul kyun hai 'aziz'

abhi to pahli hi manzil hai justuju karte