Bar-e-digar Ye Falsafe Dekhun

bar-e-digar ye falsafe dekhun

zaKHm phir se hare-bhare dekhun

ye basirat ajab basirat hai

aainon mein bhi aaine dekhun

zawiyon se agar najat mile

sare manzar ghule-mile dekhun

nazm karna hai be-hisabi ko

lafz sare nape-tule dekhun

aaKHir aaKHir jo dastan na bane

awwal awwal wo waqiye dekhun

duriyan dhund ban ke bikhri hain

kuchh qarib aa ki fasle dekhun

ek nashsha hai KHud-numai bhi

jo ye utre to phir tujhe dekhun

le gaya wo bachi-khuchi ninden

KHwab kaise rahe-sahe dekhun

raat phaili hui hai milon tak

kya charaghon ke daere dekhun