Hue Hum Be-sar-o-saman Lekin

hue hum be-sar-o-saman lekin

safar ko kar liya aasan lekin

kinare zad mein aana chahte hain

utarne ko hai ab tufan lekin

bahut ji chahta hai khul ke ro len

lahak uTThe na gham ka dhan lekin

talluq tark to kar len sabhi se

bhale lagte hain kuchh nuqsan lekin

tawazun aa chala hai zehn-o-dil mein

shikasta haal hai mizan lekin

bahut se rang utre barishon mein

dhanak ke khul gae imkan lekin